अर्थ

खाद्यान्नमा आत्मनिर्भर रुकुमपश्चिममा यसवर्ष आवश्यकताभन्दा बढी खाद्यान्न उत्पादन

रुकुमपश्चिम । रुकुमपश्चिममा आवश्यकताभन्दा बढी खाद्यान्न उत्पादन भइरहेको छ। कृषि विकास कार्यालयका अनुसार खाद्यान्नमा आत्मनिर्भर यस जिल्लामा वर्षमा आवश्यकताभन्दा बढी खाद्यान्न उत्पादन हुने गरेको छ।

आर्थिक वर्ष २०७६/०७७ मा एक लाख ७० हजार ९२ जिल्लावासीलाई ३४ हजार १८८ मेट्रिक टन खाद्यान्न आवश्यक रहेकामा ३५ हजार ७६० मेट्रिक टन खाद्यान्न उत्पादन भएको थियो।

जिल्लामा वर्षेनी खाद्यान्न पुगेर बचत हुने गरेको कृषि विकास कार्यालयका निमित्त प्रमुख मीनबहादुर केसीले जानकारी दिए। गत वर्ष एक हजार ५७२ मेट्रिक टन धान, गहुँ, मकैलगायतको खाद्यान्न बचत भएको थियो।

जिल्लामा सबैभन्दा बढी गहुँ उत्पादन हुने गरेको छ। चार हजार ५८९ हेक्टर क्षेत्रफलमा गहुँ खेती हुने गरेकामा गत वर्ष २७ हजार ८५९ मेट्रिक टन गहुँ उत्पादन भएको केसीले बताए।

त्यस्तै १४ हजार ९८८ मेट्रिक टन मकै, नौ हजार ७५६ मेट्रिक टन धान, एक हजार ११ मेट्रिक टन कोदो र एक दशमलव ८० मेट्रिक टन फापर उत्पादन भएको कार्यालयले जनाएको छ।

जिल्लामा मकै चार हजार ६८ हेक्टर, धान तीन हजार ४८ हेक्टर, कोदो ३६९ हेक्टर, जौँ ३६७ हेक्टर र फापर दुई दशमलव पाँच हेक्टर जमिनमा खेती हुने गरेको छ। उर्वर भूमि र बाँझो जमिनको उपयोगलाई बढाइएका कारण खाद्यान्न उत्पादन बढिरहेको बताइएको छ।

Leave a Reply

Your email address will not be published. Required fields are marked *