जीवन यात्रा

जीवन यात्रा: ओछ्यानमै थलिए ‘कर्नाली दख्खिन बग्दो छ’ का पुन्नबहादुर

मुगु । अँगेनामा आगो बलिरहेको छ, ओदानमाथि एउटा ताप्केमा पिठो र केही चामलका मुठी फत्फत पाकिरहेको आवाज आइरहेको छ, चुलोको दायाँपट्टी दुई छोरी एक छोरा आगोमा हात फिँजाएर आगो तापिरहेका छन् । एक अधबैंसे महिला बाहिर भित्र गर्दै केही खोजीरहेकी जस्तै गरिरहेकी छन् । 

चुलोको पूर्वपट्टी भुइँमा एक थान कपडा ओछ्याइएको छ, त्यसमाथि एउटा महिलाको पातलो सल ओडेर गोडामाथि हात राख्दै बसेका एक व्यक्ति मलिन अनुहार लिएर टोलाइरहेका छन् ।

लाग्छ उनले आफ्नो सामुन्ने बसिरहेका तीन बालकका बारे सोच्दै टोलाएका हुन् । यो मनै भावविभक बनाउने दृष्य कुनै सिनेमा वा कुनै नाटकको भनै एक पत्रकार तथा कलाकारको घरमा देखिएको वास्तविक दृष्य हो ।

पत्रकार तथा कलाकार सुमन मल्ल मधुमेह, बाथ र उच्च रक्तचापले थलिएर पछि आर्थिक अभाव र गरीबीका कारण उपचार गर्ने आर्थिक क्षमता नहुँदा उपचारको पर्खाइमा यसरी नै मुगु जिल्ला छायाँनाथ रारा नगरपालिका-१ ठिनी टोलमा रहेको आफ्नो घरमा एक वर्षयताबाट दिन कटाउदै आएका छन् ।

मल्लले कर्णालीको यथार्थ जीवनमा आधारित रहेर बनाइएको चर्चित नाटक कर्नाली दक्षिण बग्दो छ र कर्नालीवासीलाई सपना देखाउने गरी बनाइएको अर्को चर्चित नाटक सुइना कर्नालीको नाटकका मुख्य पात्रका रुपमा भूमिका खेलेका थिए । 

रोग, भोग, विकटतामा रहेर आफ्नो कष्टकर जीवन बिताउँदै आएका कर्णालीवासीको जीवन नाटक र पत्रकारितामा उतार्दै सयौंको पीडामा मलम लगाएका मल्लले एक वर्षबाट ओछ्यानमै थलिँदा पनि कोही सहयोगी मन भेटाउन सकेका छैनन ।

घरको अवस्था बिहान बेलुका छाक टार्न धौधौ पर्ने गरेको छ, त्यसमा तीन छोराछोरीलाई पाल्नुपर्ने, बूढी आमा र श्रीमतीको मायाको पिरोलो रहेको, रोग सामान्य भए पनि औषधि गर्ने एकसुको पनि नहुँदा ओछ्यानमै थलिनु परेको मलिन स्वरमा पत्रकार मल्ल भन्छन् ।

लामो समयदेखि मुगुमा बसेर नागरिक दैनिक, नयाँपत्रिका दैनिक र स्थानीय रेडियो मुगुमा स्टेसन इञ्चार्जका रुपमा काम गर्दै आएका मल्लले ओछ्यानमै थलिएपछि दुई वर्षयताबाट समाचार र नाटक लेख्न र खेल्न सकेका छैन ।

गत वर्ष बिरामी हुँदा छायाँनाथ रारा नगरपालिकाले ५० हजार सहयोग गरेपछि नेपालगञ्ज मेडिकल कलेजमा उपचार गरेका थियौं त्यो बेला पत्रकार महासंघ मुगुमा आबद्ध पत्रकारले पनि सहयोग गरेका थिए, पछि पुनःबिरामी हुँदा कर्णाली स्वास्थ्य विज्ञान प्रतिष्ठान जुम्लाको सहयोग र जुम्लाका क्रियाशील पत्रकारको सहयोगमा उपचार भयो । 

‘उनकी श्रीमती गंगा मल्ल आँखाबाट आँशु झार्दै भन्छन, ‘सहयोग गरेको रकमले सामान्य उपचार भए पनि काठमाडौंलगायत अन्य मुख्य सहर रहेका सुविधा सम्पन्न अस्पतालमा उपचार गर्न पाए निको हुनुहुन्थ्यो कि ।’ उनी भन्छन्, ‘बिहान बेलुका खाना खानेसम्म अवस्था नाजुक छ कसरी औषधि गरौं त्यो बेला पत्रकार नहुनुस् कतै जागिर खानुस्, नभए व्यापार गरौं भनेको थिए मान्नु भएन अहिले पैसा कताबाट ल्याउ छोराछोरी बूढी सासू पालु कि श्रीमान्को उपचारका लागि माग्दै हिँडु ।’

सुइना कर्णाली र कर्णाली दख्खिन बग्दो छ, नाटक काठमाडौंमा चलिरहँदा नेपालमा रंगमञ्चको कोसेढुंगा सावित भई त्यसयता नाटकमा दर्शक तानिएका थिए । रंगमञ्चका एक मुख्य पात्र उही पुन्नबहादुर विश्वकर्मा (हुड्के) को भूमिका निर्वाह गरेर चर्चित बनेका सुमन लामो समयसम्म बिरामी परेर ओछ्यानमा थलिँदा भने न त पत्रकाररिताका नाममा भाषण ठोक्दै हिँड्ने पत्रकार आए न त रंगमञ्चका बादशाह सम्झने रंगकर्मी नै ।

Leave a Reply

Your email address will not be published. Required fields are marked *