स्वास्थ्य

युराेपेली देशहरूले एस्ट्राजेनेकाकाे खाेप लगाउन पुनः सुरु गरे

पेरिस । फ्रान्स र जर्मनीमा पनि शुक्रबारदेखि कोभिड-१९ विरुद्धको एस्ट्राजेनेकाको खोप लगाउन पुनः सुरु भएको छ ।

युरोपेली नियामक निकायले एस्ट्राजेनेका खोप सुरक्षित रहेको जनाउँदै खोप लगाउने प्रक्रिया पुनः सुरु गर्न युरोपेली मुलुकहरु समक्ष आग्रह गरेको थियो ।

उता, अमेरिकामा तोकिएको मितिअगावै १० करोड खोप दिने लक्ष्य पूरा गर्न लागेको अमेरिकी प्रशासनले जनाएको छ । राष्ट्रपति बाइडेनले खोपको उपलब्धता र वितरणमा कुनै समस्या आउन नदिने पटकपटक प्रतिबद्धता व्यक्त गरेका छन् । 

रगत जम्ने सम्भावित आशंकालाई लिएर युरोपदेखि एसिया र दक्षिण अमेरिकाका विभिन्न मुलुकले एस्ट्राजेनेका खोप लगाउन रोकेका थिए ।

युरोपेली नियामक निकायले खोप सुरक्षित र प्रभावकारी रहेको भनाई सार्वजनिक गरेलगत्तै स्पेन, इटाली, नेदरल्यान्ड्स, पोर्चुगल, लिथुयानीया, लाटभिया, स्लोभेनिया र बुल्गेरीयाले खोप अभियान सुरु गर्ने बताएका छन् । 

फ्रान्समा कोभिड-१९ को संक्रमण फैलिएसँगै शनिबार रातिदेखि एक महिने सीमित लकडाउन सुरु भएको छ। फ्रान्समा चार महिनायता एकैदिन सबैभन्दा बढी संक्रमित भेटिएका थिए ।

पेरिसमा अत्यावश्यक बाहेकका सबै व्यवसाय बन्द हुनेछन् । यद्यपी, विद्यालयहरु भने खुला गरिने र घरबाट १० किलोमिटरसम्म मात्र यात्रा गर्न स्थानीयवासीलाई अनुमति दिइएको छ ।

विश्व स्वास्थ्य संगठन (डब्लुएचओ) ले पनि एस्ट्राजेनेका खोपको सुरक्षा र प्रभावकारिताका बारेमा गरिरहेको अनुसन्धानको नतिजा शुक्रबार सार्वजनिक गर्दैछ ।

ढुवानी र भण्डारमा सहज तथा सस्तो मूल्यमा उपलब्ध हुने यो खोप बेलायतको अक्सफोर्ड विश्वविद्यालय र स्वीडेनको औषधि निर्माता कम्पनी एस्ट्राजेनेकाले संयुक्त रुपमा विकास गरेका हुन् ।

एस्ट्राजेनेकालाई हाल कोभाक्समा समावेश गरिएको छ । कोभिडविरुद्धको खोपलाई विश्वका विभिन्न मुलुकमा समान रुपमा वितरण गर्न कोभ्याक्सले मद्दत गरिरहेको छ ।

उता, फिलिपिन्सका औषधि नियामक निकायले रुसले विकास गरेको स्पुतनिक भी खोपलाई आपतकालीन प्रयोगका लागि अनुमति दिएको छ । फिलिपिन्सले ५० लाखदेखि एक करोड डोज खोप लिने योजना बनाएको छ । 

अमेरिकाले आफ्ना छिमेकी मुलुकहरु मेक्सिको र क्यानडालाई मद्दत गर्न लाखौं डोज एस्ट्राजेनेका खोप उपलब्ध गराउने तयारी गरेको अमेरिकी प्रशासनले जनाएको छ ।

ह्वाइट हाउसकी प्रेस सचिव जेन साकीले २५ लाख डोज मेक्सिको र १५ लाख डोज क्यानडालाई उपलब्ध गराउन लागेको पुष्टी गरिन् ।

Leave a Reply

Your email address will not be published. Required fields are marked *