अर्थ

चन्द्रागिरी हिल्सको सेयरबाट तीन सातामा ३२ प्रतिशतभन्दा बढी घाटा

जारको हल्लाका पछाडि लागेर हौसिँदै चन्द्रागिरी हिल्सको सेयरमा लगानी गर्नेहरुले नराम्रोसँग नोक्सानी व्यहोर्नु परेको छ । 

करिब ३ साताअघि (चैत २६) गते चन्द्रागिरी हिल्सको सेयर मूल्य बढेर सर्वाधिक २ हजार ८ सय रुपैयाँ प्रतिकित्तामा कारोबार भएको थियो । सर्वाधिक उच्च मूल्यमा कारोबार भएको कम्पनीको सेयर मूल्य गत शुक्रबार बैशाख १७ गतेसम्ममा ३२ प्रतिशतभन्दा धेरै घटेर १ हजार ९ सय २ रुपैयाँमा अन्तिम कारोबार भएको छ । 

चालु आर्थिक बर्षको तेस्रो त्रेमाससम्मको वित्तीय विवरणअनुसार कम्पनीले यो चालु आर्थिक बर्षको चैत १८ गतेसम्म १८ करोड रुपैयाँ नोक्सानी व्यहोरिसकेको छ । कोरोनाका कारण पर्यटकीय क्षेत्रहरु प्रभावित हुँदा कम्पनी घाटामा गएको कम्पनीको दाबी छ । तर कोरोनाकाल पूर्व पनि कम्पनी घाटामै थियो । 

कम्पनीले प्रकाशित गरेको बित्तीय विवरणअनुसार हाल कम्पनीको प्रतिसेयर आम्दानी ऋणात्मक छ । यसको अर्थ अहिले कम्पनीका लगानीकर्ताहरु प्रतिसेयर ११ रुपैयाभन्दा बढी नोक्सानमा छन् ।  कम्पनीको बित्तीय विवरण अनुसार आईपिओमा १०० रुपैयाँ लगानी गर्नेहरुको सम्पती घटेर ७९ रुपैयाँमा झरेको छ ।  

कम्पनीको वित्तीय अवस्थाभन्दा सेयर मूल्य धेरै उच्च रहेको भन्दै पहिल्यैदेखि कम्पनीको सेयरमा कर्नरिङ भएको आशंका लगानीकर्ताहरुले गर्दै आएका थिए ।

केहि दिनअघि मात्र पनि कम्पनीका सञ्चालक अम्बिकाप्रसाद पौडेलले समेत एक अन्तरबार्तामै अहिले बजारमा कायम कम्पनीको सेयर मूल्यमा २५ प्रतिशत घटाएर पनि आफूले सेयर नकिन्ने बताएका थिए । कम्पनीका सञ्चालकसमेतको यस्तो अभिव्यक्तिबाट कम्पनीको सेयरमा चलखेल भएको सहजै बुझ्न सकिन्छ । 

यसरी कम्पनीको सामान्य बित्तीय विवरणहरु समेत नकारात्मक रहेको कम्पनीमा हौसिएर, हल्लाको पछि लागेर लगानी गर्ने लगानीकर्ताहरुले फेरि एकपटक नराम्रोसंग नोक्सानी ब्यहोर्न परेको छ । 

केहि महिनाअघि पनि नेपाल पुनर्बीमा कम्पनीको सेयरमा पनि यस्तै भएको थियो । कम्पनीले राम्रो बोनस दिने र हकप्रद सेयर समेत निष्काशन गर्ने हल्ला चलाएर कम्पनीको सेयर मूल्य उचालिएको थियो । करिब ६ महिना बितिसक्दा पनि न कम्पनीले बोनस नै दिएको छ न त हकप्रद नै निष्काशन गरेको छ ।

करिब ६ महिनाअघि कम्पनीको सेयरमा लगानी गर्ने लगानीकर्ताहरुले अहिलेको बुलिस ट्रेन्डमा पनि नाफा कमाउनुको त कुरै छोडौं सावाँमा समेत घाटा व्यहोर्न परिरहेको छ ।

Leave a Reply

Your email address will not be published. Required fields are marked *